Giro di Sardegna 2023
Danter i ziclisć dla Talia y ince de d’atres perts dl monn é le „Giro di Sardegna“ na manifestaziun scialdi conesciüda. Cun chëra de chësc ann éra oramai rovada a süa 27ejima ediziun. Te chisc agn á insciö tröc albü la poscibilité da pedalé da nord a süd y da ost a vest, imparan insciö da conësce la bela isola da na sajun olach’ara é ciamó vërda y döt florësc.
Tl pröm gnô le „Giro“ metü a jí coche manifestaziun zicloturistica, olache i partezipanc jô da n post al ater coch’ai se jô saurí. Badioc y maroi apascioná de chësc sport se recorda ciamó incö coch’ara jô plüdadî.
Intratan é la manifestaziun deventada na dërta gara a tapes, a chëra che ince i atlec de n bun livel agonistich tol ioln pert. En chësc ann ê le „Giro“ che piâ ia da Muravera, jödapé dl’isola, partí sö te sis dis de gara por n total de 440 km y 5.900 metri de deslivel.
Danter i passa 400 ziclisć che á tut pert ala gara a tapes, dai 22 ai 28 d’aurí 2023, êl en chësc iade nü atlec dl Rodes Val Badia Raiffeisen che á ince arjunt de bogn resultac. Chisc pó se mostré ciamó deplü da ponsé che la maiú pert di concorënc â metü man de jená da s’alené y â insciö bele tröc chilometri tles iames.
Da alzé fora él dantadöt le bun resultat de Franz Wieser, le plü jonn dl grup, che é rové 4° tla tlassifica generala y al 2° post dla categoria olache le pröm ê Luca Raggio, che é sté cina l’ann passé pro i profescionisć. Pro vigni tapa ti á Franz tigní bot ai plü stersc, mostran insciö so bun livel agonistich.
Ince i atri atlec dl Rodes Val Badia Raiffeisen é jüs scialdi bun, da mëte man da Lois Craffonara, che é rové al 3° post dla categoria M3. Püch sot le scalin dl podest é rová Andreas Pescoll y Ivan Sommadossi che á arjunt le 4° post, respetivamënter tla categoria M2 y M5. I atri plazamënc é stá: René Pitscheider 9° (M3), Günther Frena 10° (M6), Giuseppe De Marc 10° (M5),
Igor Tavella 12° y Werner Pescosta 16° (M4).
04/05/2023
